विविध प्रकारच्या उपयुक्त कौशल्यांची आणि त्यातून निर्माण होणाऱ्या करिअर संधींची ओळख होण्यासाठी विश्व मराठी परिषदेच्या वतीने विविध ऑनलाइन कार्यशाळांचे आयोजन करण्यात आले आहे. मराठी भाषक समाजाला विविध प्रकारच्या व्यावसायिक संधी कळाव्यात व त्यासाठी आवश्यक कौशल्ये अवगत व्हावीत, या उद्देशाने या कार्यशाळा माफक शुल्कात आयोजित करण्यात आल्या आहेत.
कार्यशाळांचे विषय :
कथालेखन आणि कथाकथन, कविता लेखन आणि सादरीकरण, कॉपीराइट्स सुरक्षा आणि संरक्षण, ब्लॉगलेखन, अभिनय कौशल्ये, स्वरसंस्कार, पटकथा लेखन आणि वेबसीरिज लेखन, चित्रपट रसग्रहण, योग आणि योगोपचार, नाट्य लेखन : तंत्र आणि मंत्र, माहितीचा अधिकार, आर्थिक नियोजन, वैद्यकीय मदत कशी मिळवावी, निवृत्तीचे नियोजन, अभिजात नृत्य आणि जागतिक करिअर, ग्राहक संरक्षण कायदा, इत्यादी
विवेक वेलणकर, शमा भाटे, योगेश सोमण, प्रा. क्षितिज पाटुकले, राजन लाखे, नीलिमा बोरवणकर, अॅड. कल्याणी पाठक, प्रांजली फडणवीस असे अनेक मान्यवर या कार्यशाळांमधून मार्गदर्शन करणार आहेत.
या कार्यशाळा ऑनलाइन होणार असून, घरबसल्याच सहभागी होता येणार आहे. चार ते पाच दिवस, दररोज रोज एक तास असे या कार्यशाळांचे स्वरूप आहे. कार्यशाळांसाठी माफक शुल्क आकारण्यात येणार आहे. या ऑनलाइन कार्यशाळांचे आयोजन पाच जूनपासून करण्यात येत आहे. अधिकाधिक संख्येने या कार्यकाळांमध्ये सहभागी व्हावे असे आवाहन विश्व मराठी परिषदेच्या वतीने अनिल कुलकर्णी यांनी केले आहे. या कार्यशाळांना यथोचित प्रतिसाद लाभावा अशी अपेक्षा विश्व मराठी परिषदेचे मार्गदर्शक डॉ. श्रीपाद भालचंद्र जोशी यांनी व्यक्त केली आहे.